Sot, pas mesnate, zyra postare Zveçan-2 u sulmua me mjete shpërthyese. Ky nuk është vetëm një akt kriminal ndaj një institucioni publik, por edhe një goditje ndaj sigurisë dhe paqes së qytetarëve tanë. Një sulm i tillë cenon jo vetëm infrastrukturën e një shërbimi publik jetik, por edhe ndjenjën e përkatësisë dhe besimit që kemi ndërtuar me mund e përkushtim për vite me radhë.
Në emër të Postës së Kosovës Sh.A., dënoj fuqishëm këtë akt të papranueshëm dhe bëj thirrje që organet e rendit dhe drejtësisë ta trajtojnë me seriozitet maksimal, duke identifikuar dhe sjellë para drejtësisë autorët e këtij sulmi. Dhuna dhe frikësimi nuk kanë vend në një shoqëri të zhvilluar e demokratike, ne nuk do të lejojmë që këto veprime të na ndalin në përkushtimin tonë për të shërbyer qytetarët e Kosovës, pa dallim, anë e këndë vendit.
Në vitet e fundit, kemi punuar pa u ndalur për të ofruar shërbime cilësore për qytetarët edhe në veri të vendit. Kemi hapur 11 zyra postare, duke siguruar qasje të barabartë në shërbimet tona për të gjithë. Qytetarët e kanë mirëpritur këtë, ata kanë përdorur me besim shërbimet tona, duke dëshmuar se Posta e Kosovës Sh.A. është e nevojshme për të gjithë. Këtë më së mirë e fakton numri i transaksioneve, si të shërbimeve postare, shërbimeve financiare jo-bankare e produkteve tjera që ofrohen në zyrat e operatorit publik postar të Republikës së Kosovës.
Pavarësisht këtij sulmi, shërbimet postare në këtë komunë do të vazhdojnë. Qytetarët mund të përdorin zyrën postare Zveçan-1, e cila ndodhet në objektin e Komunës. Ndërkohë, zyra postare Zveçan-2 do të rikthehet së shpejti në funksion, falë përkushtimit të stafit tonë nga radhët e të gjitha bashkësive e me mbështetjen e institucioneve tona.
Në këtë moment, dua të falënderoj Policinë e Kosovës për reagimin e shpejtë dhe profesional. Dhuna nuk mund të jetë asnjëherë zgjidhje, ne nuk do të lejojmë që frika të zëvendësojë vlerat e përbashkëta. Posta e Kosovës Sh.A. do të vazhdojë të qëndrojë në shërbim të çdo qytetari, si një simbol i stabilitetit dhe përparimit të përbashkët.
Një falënderim i veçantë shkon për të gjithë qytetarët e Kosovës, të cilët na kanë dhënë besimin e tyre dhe na kanë mbështetur në rrugëtimin tonë. Ky besim na motivon të vazhdojmë të punojmë me përkushtim për të ofruar shërbime të sigurta, të shpejta dhe të qasshme për të gjithë. Posta e Kosovës Sh.A. mbetet e qytetarëve dhe në shërbim të qytetarëve!
English